無破解。免費用軟體
好好談戀愛
網頁設計自由人

 


   我的太鼓一年


2005年10月3日放工前收到咩咩既電話,
突然來了個即興既飯聚,
食完飯後一行人落左新之,
友人想打太鼓,不過我猶豫左一陣‥
 
諗返起‥數年前‥
好似係行花市之後,又係同班友人上左世貿 Namco,
見勤勤就去玩左鋪太鼓,
個次我見到打完之後報分,
唔記得佢上到咩級數,
總之就係覺得,太鼓唔易玩,
個 D 手眼協調,聽拍子,
對於全無音樂底同手眼協調差既我黎講,
如果要上到最高級,究竟要花幾多時間玩呢?
 
個局如果玩一局,好似掉錢落地咁,無咩意思,
如果玩,純粹係同朋友開心下罷了。
 
個晚,唔識放銀跟機,
以為輪到我地個陣先有人話我地知依個慣例,
又要等,我地都諗著唔玩了,
於是走去睇其他機,
跟著諗住走既時候,
見到部太鼓機無人打,
先走去草草地打返局。
 
我記得我好似打左兩首,
一首花一首竹,
好似係一首叮噹一首 DQ 8 序曲。
花個首 Pass 左,
連左十幾 combo 班友人都話好野 =_=
之後個首竹就瓜左,
我首好似係同小白夾的,
我地係局中既第二曲瓜柴,
往後我既日記係寫:又幾好玩喎!
 
就係依個第一次,無想像中咁難,
挑起左我對太鼓既興趣。
 
第二次去打太鼓係兩星期後我生日個晚,
個晚約左班友人旺角七點半食飯未夠鐘,
七點落左新之城,無人,打左兩鋪,
個次係我第一次一個人入機鋪打太鼓,
個次我由花一星打到四星,
正式地開始左我既練太鼓之火 XD
 
***
之後,一連幾個星期六放工,
我都會去沙田 Funzone 打鼓,
星期六下畫好多人,要怒跟機,
打兩三局都要成兩粒鐘咁滯!
 
個期有唔少鬼人出沒,
打北斗之拳,打戀文(Fail),
但我都覺得好勁,
唔知幾時先打到佢地咁呢?
 
每次入機鋪前都會有點戰戰競競,
因為好心急想玩,希望唔好太多人唔洗跟咁耐機啦‥
同埋雖然話唔會理起鬼群當中打花打竹,
但始終都係會有少少壓力。
 
***
打左一兩個星期,鋪癮越來越大,
想了解更多太鼓既野,甚至認識下其他太鼓高手,
所以有幾日狂上網 Search,
搵到 FC,開始入去問問題,吹水,
有好多所見所聞,都令我嘆為觀止,
又更加對太鼓更加投入,
知到原來要玩可以玩得好 Pro,
甚至已經唔可以用玩黎形容,真係叫練了‥
 
發現了近工作地點既太子場,
個到人唔多,唔洗跟機,
以後食晏放工都可以去一轉,勁開心!
之後打密左,慢慢日日兩三局咁,又有計劃咁練‥
 
有一個十一月尾既星期六,起太子適逢集鼓唔知秋祭定冬祭,
好多神人高手,但見佢地一齊夾鼓切磋,
無想像中個種挑機味,感覺幾好,
不過可惜個陣仲打緊竹,距離太遠了,
所以睇左幾眼就走左‥
 
個時心諗,幾時我會係聚既其中一人,
同一眾高手好好地夾鼓呢?
 
***
十二月,膽粗粗開左樹人聚,
比想像中反應湧躍,
樹人得幾個,鬼人一大堆,
個時岩岩上樹,同大家仲有大大距離,
不過可以認識到好多集鼓人,都好開心,
而且個日,仲第一次遇見生命中重要既另一半,當然‥
個陣時仲未知,亦唔會諗到佢係將來既另一半‥
佢都係當日極少數真樹當中既其中一位樹精 XD
 
***
之後既日子,除了起 FC,亦都開始起集鼓村打滾,
出多幾次聚,去到 06 年 2 月既日子,
開始 Group 埋左一 D 人,好似定期咁每星期起太子有小聚,
慢慢地起集鼓村就有左幾個比較熟落既鼓友,
亦漸漸地脫離左一人修行既日子。
 
起定期小聚同大聚以外,起四月以前,
都係多起太子一人深山修行,
因為唔太慣越級挑戰,比人帶到慘死,
亦因為咁,上到鬼無耐有一段日子進步得頗慢。
 
三月個時極能減到兩蚊,超平!
所以主場就由太子轉左去極能‥
 
有可能係緣份,又或者係有意無意既默契,
極能慢慢成為「我地」成日相遇既地方,
個期開始有好多時間都係我地一齊夾鼓既日子。
 
之後個幾個月,仲發生左好多事,拉近左我地,
唔係完全同太鼓有關,不過在此之前,
都係太鼓作為左一條紅線,連著我地,
記得曾經起討論區講過:「打太鼓會識到伴?係就經典囉!」
雖然個時都的確係有幾對情侶係咁野起埋一齊,
但要話會發生起自己身上,始終係有點不可思義‥
但事實的確係如此‥
我只可以話,人生實在係有太多野猜測不透‥
所以有人話,未來因為測不透而不安,
但從另一角度看,亦都因為測不透,人生才充滿希望同傳奇,
只要有一棵願意朝好方面改變既積極態度,只要相信著未來,
一切無可能既事,都有可能發生。
 
正如一年後既今日,
雖然自己唔係咩太鼓神人,
但都叫 Pass 到大部份歌,間中都會庸碌 Full下,
同一眾高手夾鼓都可以叫切磋切磋了。
 
識到一班集鼓人,
可以同妳起埋一齊。
 
一年並唔係好長既時間,但依年既變遷同經歷,
有可能其他人一生都未必有有機會遇到,
我唔感恩讚嘆神既奇妙安排同同恩典祝福,
仲有咩野更好既話好說呢?

 

誰是凱楊 我的日記 心情小影 默然回首 近期喜好 訪客留言